கடவுளுக்கு என்ன தேவை? பல வருட தேடலுக்குப் பின் கிடைத்த உன்னதமான வாழ்வியல் சிந்தனை!

 மனித வாழ்க்கையில் இன்பங்களும் துன்பங்களும் மாறி மாறி வருவது இயற்கை. ஆனால், மனிதர்களுக்குக் கஷ்டம் வரும்போதெல்லாம் கடவுள் அதிகமாகத் தேவைப்படுகிறார். தங்களின் துயரங்களில் இருந்தும் சோதனைகளில் இருந்தும் விடுவிக்கக் கடவுளால் மட்டும்தான் முடியும் என்று மனிதர்கள் ஆழமாக நம்புகிறார்கள். கஷ்டங்கள் நேரிடும் போதெல்லாம், துயரங்கள் வந்து வாட்டும் போதெல்லாம், மனிதனின் மனம் அமைதியை விரும்பும் போதெல்லாம் அவர்கள் கடவுளையும் கோயிலையும் தேடிச் செல்கிறார்கள். இதனால் தான் மனிதர்களுக்கு எப்போதும் கடவுள் தேவைப்படுகிறார்; சுருக்கமாகச் சொன்னால், மனிதன் தன் சுயநலக் கஷ்டத்திற்கு மட்டுமே கடவுளைத் தேடுகிறான்.

மனிதனுக்குக் கடவுள் தேவை சரி, அப்படியானால் "கடவுளுக்கு என்ன தேவை?" என்ற கேள்வியை நாம் என்றாவது ஆழமாகச் சிந்தித்திருக்கிறோமா? அதைப்பற்றிய ஒரு ஆழமான தத்துவார்த்த வாழ்வியல் பதிவை இந்த  கட்டுரையில் விரிவாகப் காணலாம்

 1. கடவுள் மனிதர்களிடம் இருந்து எதை எதிர்பார்க்கிறார்?

கடவுளுக்கு மனிதர்களின் வேண்டுதலும், மனிதர்கள் தன்னைச் சுற்றிச் சுற்றி வர வேண்டும் என்பதும், தங்களை வணங்க வேண்டும் என்பதும் எப்போதும் தேவையோ அல்லது விருப்பமோ என்று நாம் நினைத்துக் கொண்டிருக்கிறோம். கடவுளை நாள்தோறும் வணங்குபவர்கள், கோயில்களைச் சுற்றுபவர்கள் மட்டும்தான் கடவுளுக்குப் பிடித்திருக்கிறதா? கடவுளுக்கு மனிதர்கள் தேவையா? மனிதர்களின் காணிக்கைகள் தேவையா? அல்லது மனிதர்கள் பலியிடும் பிற உயிர்கள் தேவையா? 

ஆழமாக யோசித்தால், கடவுள் மனிதனின் அன்பை விரும்புவாரா என்ற கேள்வி எழுகிறது. நிமிடத்திற்கு நிமிடம் மாறிப்போகும் மனிதனின் அன்பு கடவுளுக்குத் தேவைப்படுமா? தங்களின் நண்பர்களுக்குள், தங்களின் காதல்களுக்குள், தங்களின் சொந்த உறவுகளுக்குள், மற்றும் தன்னை நம்பி வந்தவர்களுக்குத் துரோகம் செய்யும் மனிதர்களின் சுயநல அன்பு கடவுளுக்கு எப்படித் தேவைப்படும்?

 2. பல வருட ஆய்வுக்குப் பின் கிடைத்த உன்னத உண்மை

இப்படியாக நான் நீண்ட காலமாக மனிதர்களின் குணங்களையும் ஆன்மீகத்தையும் பற்றி ஒரு ஆழமான வாழ்வியல் ஆய்வு ஒன்றை நடத்தினேன். "கடவுளுக்குத் தேவை மனிதன் மனிதனாக மாற வேண்டும் என்பதுதான்" என்பதைத் தான் நான் இன்று எனது அக உலகத்தில் முழுமையாக உணர்ந்தேன். இந்த உலகத்தில் உள்ள எல்லாப் புனிதக் கடவுள் நூல்களும் மனிதர்களுக்குள் அன்பை விதைக்கத்தான் பாடுபடுகின்றனவே தவிர, சடங்குகளை அல்ல. 

நாம் தான் பல ஆண்டுகளாகப் பிறந்ததிலிருந்தே கோயிலுக்குப் போய்க் கொண்டே இருக்கிறோம். ஆனால், இத்தனை காலத்திற்குப் பிறகும் நாம் இன்னும் சக மனிதனை மதிக்கும் உண்மையான மனிதனாக மாறாமல் இருக்கிறோம் என்பதுதான் கடவுளுக்குப் பிடிக்காத மிக முக்கியமான ஒன்றாக இருக்கும். கடவுளுக்குத் தேவை மனிதர்கள் மனிதராக வாழ வேண்டும் என்பது மட்டும்தான்.

 3. பொய் சொன்னால் சாமி கண்ணைக் குத்துமா?

சின்ன வயதில் நான் விளையாடிக் கொண்டிருக்கும்போது என்னிடம் எனது நண்பன் ஒருவன் சொன்னான், "பொய் சொல்லாதே, பொய் சொன்னால் சாமி கண்ணைக் குத்தும்" என்றான். நான் வளர்ந்த பிறகு எத்தனையோ முறை மனிதர்கள் பொய் சொல்லியும் சாமியின் கண்ணைக் குத்தவில்லையே என்று தனியாக யோசிக்கத் தொடங்கினேன். அப்பொழுதுதான் எனக்குள் ஒரு உன்னத உண்மை பிடிபட்டது. 

அந்த ஒரு சிறிய பொய்யைத் தடுப்பதில்தான் கடவுள் இருக்கிறார். மனிதர்கள் பொய் சொல்லக்கூடாது என்று கடவுள் விரும்புகிறார். அதனால் தான் பெரியவர்கள் "சாமி பொய் சொன்னால் கண்ணைக் குத்தும்" என்று கடவுளின் பெயரால் ஒரு நல்லொழுக்கப் பொய்யைச் சொல்லியிருக்கிறார்கள். இப்படியாக எல்லா மதங்களும் மனிதன் அன்புடையவனாகவும், நம்பிக்கை உடையவனாகவும், ஆசைகளைத் தாண்டிய வாழ்வியல் தூய்மையோடும் வாழ வேண்டும் என்றுதான் விரும்புகின்றன.

முடிவுரை: மனிதனாக வாழ்வதே ஆன்மீகம்

பூமியில் உள்ள அனைத்துச் செடி, கொடிகள், விலங்குகள் யாவும் இயற்கையின் விதிகளுக்கு உட்பட்டுத் தங்களின் இயல்போடு வாழ்கின்றன. ஆனால், மனிதன் மட்டுமே மனிதத்தன்மையை இழந்து வாழ்கிறான். கோயிலுக்குச் செல்வதோ, சடங்குகள் செய்வதோ கடவுளுக்கான தேவை அல்ல. உங்கள் கஷ்டத்திற்கு மட்டும் கடவுளைத் தேடாமல், சக மனிதர்களுக்குத் துரோகம் செய்யாமல், அன்போடும் இரக்கத்தோடும் வாழ்வதே கடவுள் விரும்பும் உண்மையான ஆன்மீகம். எனவே, நாம் கடவுளைத் தேடி அலைவதை நிறுத்திவிட்டு, முதலில் மனிதனாக வாழப் பழகுவோம்!

---

💡 எங்களது அடுத்த பயனுள்ள வாழ்வியல் விழிப்புணர்வுக் கட்டுரையை வாசிக்க:

👉 மேலும் படிக்க: [உறவுகளின் ஆயுட்காலம் எத்தனை ஆண்டுகள்? இரு மனங்களுக்கு இடையே உள்ள புரிதல் சிந்தனை!]https://www.thangathamilanpage.com/2026/09/uravugalin-aayutkaalam-evvalavu-aandugal.html